1ܦܵܘܠܘܿܣ؛ ܫܠܝܼܚܵܐ ܕܝܼܫܘܿܥ ܡܫܝܼܚܵܐ ܒܪܸܙܵܝܹܗ ܕܐܲܠܵܗܵܐ؛ ܠܩܲܕܝܼܫܹ̈ܐ ܕܝܼܢܵܐ ܓܵܘ ܐܵܦܸܣܘܿܣ ܘܠܡܗܘܼܡܢܹ̈ܐ ܒܝܼܫܘܿܥ ܡܫܝܼܚܵܐ؛ 2ܫܠܵܡܵܐ ܥܲܡܵܘܟܼܘܿܢ ܘܫܵܦܵܩܲܬ ܡ̣ܢ ܐܲܠܵܗܵܐ ܒܵܒܲܢ؛ ܘܡ̣ܢ ܡܵܪܲܢ ܝܼܫܘܿܥ ܡܫܝܼܚܵܐ. 3ܒܘܼܪܟܼܵܐ ܝܠܹܗ ܐܲܠܵܗܵܐ ܒܵܒܹܗ ܕܡܵܪܲܢ ܝܼܫܘܿܥ ܡܫܝܼܚܵܐ؛ ܗ̇ܘ ܕܒܘܼܪܟܼܵܚܠܹܗ ܒܟܠ ܒܘܼܪܟܬܼܵܐ ܪܘܼܚܵܢܵܝܬܵܐ ܒ (ܕܘܼܟܵܢܹ̈ܐ) ܫܡܲܝܵܢܹ̈ܐ ܒܡܫܝܼܚܵܐ؛ 4ܕܵܐܟܼܝܼ ܕܓܘܼܒܝܵܚܠܹܗ ܒܝܼܹܗ ܡ̣ܢ ܩܵܕ݇ܡ ܒܸܢܝܲܬܹ̈ܗ ܕܥܵܠܡܵܐ؛ ܕܗܵܘܵܚ ܩܲܕܝܼܫܹ̈ܐ ܘܕܠܵܐ ܡܘܼܡܵܐ ܩܵܕ݇ܡܘܼܗܝ؛ 5ܘܒܚܘܼܒܵܐ ܩܲܕ݇ܡܵܝܬܵܐ ܪܫܝܼܡܵܚܠܹܗ ܠܥܒܼܵܕܬܵܐ ܕܒܢܘܿܢܹ̈ܐ ܒܝܲܕ ܝܼܫܘܿܥ ܡܫܝܼܚܵܐ ܠܓܵܢܹܗ؛ ܐܲܝܟܼ ܕܫܦܸܪܵܐ ܠܪܸܙܵܝܹܗ؛ 6ܠܫܘܼܒܼܚܵܐ ܕܐܝܼܩܵܪܵܐ ܕܫܵܦܵܩܲܬܹܗ؛ ܗ̇ܝ ܕܡܘܼܫܦܸܟܼܠܹܗ ܐܸܠܲܢ ܒܡܘܼܚܸܒܵܐ؛ 7ܕܒܝܼܹܗ ܐܝܼܬܼ ܠܲܢ ܦܘܼܪܩܵܢܵܐ ܒܝܼܸܕ ܕܸܡܹܗ ܫܒܼܵܩܵܐ ܕܓܢܵܗܹ̈ܐ؛ ܐܲܝܟܼ ܕܵܘܸܠܬܵܐ ܕܫܵܦܵܩܲܬܹܗ؛ 8ܗ̇ܝ ܕܦܸܫܠܵܗ̇ ܡܘܼܙܝܸܕܬܵܐ ܒܝܼܲܢ ܒܟܠ ܥܵܩܸܠܕܵܪܘܼܬܼܵܐ ܘܒܼܟܠ ܦܲܪܡܵܝܬܵܐ؛ 9ܘܡܘܼܕܸܥܠܹܗ ܐܸܠܲܢ ܣܸܪ ܕܪܸܙܵܝܹܗ؛ ܐܲܝܟܼ ܕܫܦܸܪܹܐ ܐܸܠܹܗ؛ ܐܲܝܢܝܼ ܕܡܘܼܬܸܒܼܠܹܗ ܩܵܕ݇ܡܵܝܬܵܐ ܒܝܼܹܗ؛ 10ܠܡܕܲܒܪܵܢܘܼܬܼܵܐ ܕܬܲܡܵܡܬܘܼܬܵܐ ܕܙܲܒܼܢܹ̈ܐ؛ ܕܟܠ ܡܸܢܕܝܼ ܦܵܝܸܫ ܚܒܼܝܼܫܵܐ ܒܡܫܝܼܚܵܐ؛ ܕܒܫܡܲܝܵܐ ܘܕܒܲܐܪܥܵܐ؛ ܗܲܪ ܒܝܼܹܗ؛ 11ܕܐܘܼܦ ܒܝܼܹܗ ܐܲܚܢܲܢ ܗَܘܹܐܠܲܢ ܝܵܪܘܿܬܹܗ؛ ܟܲܕ ܦܸܫܠܲܢ ܪܫܝܼܡܹܐ ܐܲܝܟܼ ܪܫܵܡܬܵܐ ܕܗ̇ܘ ܕܒܸܦܠܵܚܵܐ ܝܠܹܗ ܟܠ ܡܸܢܕܝܼ ܐܲܝܟܼ ܚܝܵܠ ܕܪܸܙܵܝܹܗ؛ 12ܕܗܵܘܵܚ ܐܲܚܢܲܢ؛ ܐܵܢܝܼ ܕܩܵܕ݇ܡܵܝܬܵܐ ܦܸܫܠܲܢ ܒܗܹܒܼܝܼ ܒܡܫܝܼܚܵܐ؛ ܠܫܘܼܒܼܚܵܐ ܕܬܸܫܒܘܿܚܬܹܗ؛ 13ܕܐܘܼܦ ܐܲܚܬܘܿܢ ܒܝܼܹܗ ܫܡܸܥܠܵܘܟܼܘܿܢ ܗܸܡܸܙܡܵܢ ܕܣܲܪܲܣܬܘܼܬܵܐ؛ ܕܝܼܠܵܗ̇ ܐܼܘܲܢܓܵܠܝܼܘܿܢ ܕܚܲܝܵܘ̈ܟܼܘܿܢ؛ ܕܒܝܼܹܗ؛ ܟܲܕ ܗܘܼܡܸܢܵܘܟܼܘܿܢ؛ ܦܸܫܠܵܘܟܼܘܿܢ ܡܸܚܝܹܐ ܡܵܘܗܪ ܒܪܘܼܚܵܐ ܕܩܘܼܕܫܵܐ ܕܩܵܘܠܵܐ؛ 14ܗ̇ܘ ܕܝܼܠܹܗ ܓܸܪܵܘ ܕܝܵܪܬܘܼܬܲܢ؛ ܠܦܘܼܪܩܵܢܵܐ ܕܐܵܢܝܼ ܕܚܲܝܝܼ؛ ܠܫܘܼܒܼܚܵܐ ܕܬܸܫܒܘܿܚܬܹܗ. 15ܣܵܒܵܒ ܕܐܵܗܵܐ ܐܘܼܦ ܐܵܢܵܐ؛ ܗܵܐ ܡ̣ܢ ܕܫܡܸܥܠܝܼ ܗܲܝܡܵܢܘܼܬܵܐ ܕܓܵܘܵܘܟܼܘܿܢ ܕܒܡܵܪܲܢ ܝܼܫܘܿܥ؛ ܘܚܘܼܒܵܘܟܼܘܿܢ ܕܠܟܸܣ ܟܠܵܝܗܝ ܩܲܕܝܼܫܹ̈ܐ؛ 16ܠܹܐ ܝܘܸܢ ܒܸܫܠܵܝܵܐ ܡ̣ܢ ܠܫܵܟܘܿܪܹܐ ܣܵܒܵܒ ܕܝܼܵܘܟܼܘܿܢ؛ ܘܠܸܕܟܼܵܪܵܘܟܼܘܿܢ ܒܨܠܵܘܵܬܝܼ̈؛ 17ܕܐܲܠܵܗܹܗ ܕܡܵܪܲܢ ܝܼܫܘܿܥ ܡܫܝܼܚܵܐ؛ ܒܵܒܵܐ ܕܬܸܫܒܘܿܚܬܵܐ؛ ܝܵܗ݇ܒܸܠ ܠܵܘܟܼܘܿܢ ܪܘܼܚܵܐ ܕܥܵܩܸܠܕܵܪܘܼܬܵܐ ܘܕܓܸܠܝܵܢܵܐ ܒܝܕܸܥܬܹܗ؛ 18ܘܒܲܗ݇ܪܸܢܝܼ ܥܲܝܢܹ̈ܐ ܕܦܲܪܡܵܝܬܵܘܟܼܘܿܢ؛ ܕܝܲܕܥܝܼܬܘܿܢ ܡܘܼܕܝܼ ܝَܠܵܗ̇ ܗܹܒܼܝܼ ܕܩܪܵܝܬܹܗ؛ ܘܡܘܼܕܝܼ ܝَܠܵܗ̇ ܕܵܘܸܠܬܵܐ ܕܚܸܩܪܵܐ ܕܝܵܪܬܘܼܬܹܗ ܒܩܲܕܝܼܫܹ̈ܐ؛ 19ܘܡܘܼܕܝܼ ܝَܠܵܗ̇ ܒܘܼܫܵܝܘܼܬܵܐ ܕܓܘܼܪܘܼܬܵܐ ܕܚܲܝܠܹܗ ܒܝܼܲܢ ܒܐܵܢܝܼ ܕܗܲܡܸܢܵܚ؛ ܐܲܝܟܼ ܦܠܵܚܬܵܐ ܕܙܲܪܒ ܕܚܲܝܠܹܗ؛ 20ܗ̇ܝ ܕܦܠܸܚܠܹܗ ܒܡܫܝܼܚܵܐ؛ ܟܲܕ ܡܘܼܩܸܡܠܹܗ ܡ̣ܢ ܡܝܼܬܹ̈ܐ؛ ܘܡܘܬܝܸܒܼܠܹܗ ܡ̣ܢ ܝܲܡܝܼܢܹܗ ܒ (ܕܘܼܟܵܢܹ̈ܐ) ܫܡܲܝܵܢܹ̈ܐ؛ 21ܠܥܸܠܸܠ ܡ̣ܢ ܟܠ ܐܲܪܟܘܿܣ ܘܫܘܼܠܛܵܢܵܐ؛ ܘܚܲܝܠܵܐ؛ ܘܡܵܪܘܼܬܵܐ؛ ܘܡ̣ܢ ܟܠ ܫܸܡܵܐ ܕܦܝܵܫܵܐ ܝܠܹܗ ܡܫܘܼܡܗܵܐ؛ ܠܵܐ ܗܲܪ ܒܐܵܗܵܐ ܥܵܠܡܵܐ؛ ܐܸܠܵܐ ܐܘܼܦ ܒܗ̇ܘ ܕܐܵܬܹܐ. 22ܘܥܒܼܸܕܠܹܗ ܙܲܒܛ ܟܠ ܡܸܢܕܝܼ ܬܚܘܿܬ ܐܲܩܠܘܼ̈ܗܝ؛ ܘܝܘܼܗَܒܼܸܠܹܗ ܪܹܫܵܐ ܠܥܸܠܸܠ ܡ̣ܢ ܟܠ ܠܥܹܕܬܵܐ؛ 23ܕܝܼܠܵܗ̇ ܦܲܓܼܪܹܗ؛ ܘܬܲܡܵܡܬܘܼܬܵܐ ܕܗ̇ܘ ܕܟܠ ܒܟܠ ܟܹܐ ܬܲܡܸܡ.